老夫子生活小故事
一齊睇睇老夫子同一眾角色喺疫情下嘅生活小故事，如何體現喺逆境中助人、自助嘅精神!
一場誤會
老子多情
舉手之勞
消失的端午節
有口難言
抗逆四式
老夫子的生活練習
誰明大叔心
一齊睇睇老夫子同一眾角色喺疫情下嘅生活小故事，如何體現喺逆境中助人、自助嘅精神!
一場誤會
話說疫情期間一度出現搶購潮，老夫子咁啱見到一位街坊喺超市買到一車日用品，以為佢囤貨而嬲咗！點知原來街坊係「 賽馬會樂齡同行計劃 」嘅「樂齡之友 」，佢唔單止為長者送上物資同慰問，仲親筆寫埋慰問咭，等佢哋喺社交距離措施之下都感受到他人嘅關懷！你又有無類似嘅經驗呢?
「賽馬會樂齡同行計劃」今年已經推展至全港18區，近50個合作單位，為60歲或以上受抑鬱困擾嘅長者提供情緒支援，如果老友記察覺到自己或身邊長者受到情緒困擾，記得尋求協助呀！
你都想成為「樂齡友里 」義工及「 樂齡之友 」?
如果你係50歲或以上，又有興趣參加長者精神健康培訓，喺社區中推廣精神健康同支援受抑鬱困擾嘅長者，記得留意你嗰區嘅「 賽馬會樂齡同行計劃 」合作機構「樂齡友里 」培訓課程開班時間，或密切留意「賽馬會樂齡同行計劃」Facebook專頁嘅公佈啦!
老子多情
老夫子同陳小姐兩位，可以話係「襄王有夢，神女無心」，老夫子日日送花，次次都慘食檸檬。有日陳小姐見到老夫子又喺屋企「自作多情」摺紙花! 點知原來老夫子其實係參加咗「賽馬會樂齡同行計劃」，正喺度用視訊軟件教地區中心嘅長者摺花！
老友記可能都試過，疫情期間，因為擔心染疫好少去街，中心又去唔到，喺屋企無乜細藝，有啲翳悶同孤伶伶。有見及此，「 賽馬會樂齡同行計劃 」早前喺疫情期間，透過合作院校香港大學團隊聯同合作機構，將部分服務改為網上形式進行，包括精神健康評估、介入服務、小組活動及分享等，令項目社工、「樂齡友里 」義工及「樂齡之友 」同老友記保持維繫，一齊面對疫情嘅挑戰！
而家大家開始出返多啲街，不過有時間都可以繼續透過一啲小舉動，例如打一個電話、send一條問好短訊，同親朋好友保持聯繫！
舉手之勞
唔知大家早排有無試過排長龍買外賣返屋企食，又或者排隊買抗疫用品? 我哋就聽過一啲窩心小故事，就係有啲熱心嘅市民，利用空餘時間幫助確診或在家隔離嘅親友購買物資，喺疫情中充份發揮守望相助嘅精神。
除咗分享物資，其實情緒支援都好重要！ 尤其係獨居或雙老家庭嘅長者，疫情下有機會因為長期同外界缺乏接觸，特別容易感到孤獨、焦慮同無助，增加患上抑鬱症嘅風險。但係佢哋未必會直接表達出嚟，反而可能喺日常生活中透過以下方式呈現，例如:
「賽馬會樂齡同行計劃」自2016年起一直為受抑鬱困擾嘅60歲或以上長者提供「情緒支援物資」及服務，今年計劃更已成功推展至全港18區近50個合作服務單位。如果大家留意到身邊嘅長者可能受到抑鬱困擾，請盡早尋求協助。
平日大家仲可以透過以下嘅「情緒支援物資」，幫助身邊更多受情緒影響嘅長者朋友㗎！
《清心新活：14日家中作樂》小冊子
消失的端午節
大家今個端午節點過呢? 講起端午節，相信大家都會諗起屈原。相傳屈原投江前曾經遇到一位漁夫，仲同佢剖白內心嘅悲憤同絕望，可惜漁夫唔能夠理解佢，後來滿懷鬱結嘅屈原選擇咗投江明志。如果當日屈原遇到一個知音人，能夠聆聽佢心聲、理解佢處境，佢嘅選擇會唔會唔一樣呢？
二千幾年後嘅今日，世紀疫情持續多時，唔單止影響市民嘅生活同生計，亦都為大家嘅情緒帶嚟極大衝擊，尤其係獨居長者同埋雙老家庭，佢哋喺社交距離措施下，有機會因為長期同外界缺乏接觸、生活停擺，同時面對染疫嘅憂慮同泛濫嘅疫情資訊，而感到焦慮、無助同孤獨。
如果老友記察覺到自己或身邊長者受到情緒困擾，可以聯絡「賽馬會樂齡同行計劃」合作機構，搵我哋傾傾！盡早察覺，及時介入，可能大家會發現，希望就在咫尺！
計劃合作機構聯絡方法
Click入睇全文: https://bit.ly/3NHhgpY
有口難言
喺你同我哋身邊其實有好多隱世英雄，包括時刻細心照顧家中長期病患者或長者嘅照顧者們。佢哋當中有唔少人同時要兼顧工作同家務，有時可能會忙到忽略咗自己嘅身心健康，如果唔及時處理，容易導致壓力爆煲！如果你係照顧者，當察覺到自己有情緒困擾，唔好收埋喺心，嘗試及早搵人傾傾！其實我哋每個人都有機會成為照顧者，呢條路上總有人與你同行！
「賽馬會樂齡同行計劃」自2016年起一直為受抑鬱困擾嘅60歲或以上長者提供「情緒支援物資」及有關服務，今年計劃更已成功推展至全港18區近50個合作服務單位。
想幫手支援身邊人?
50歲或以上有興趣人士可參加計劃嘅「樂齡友里」義工培訓，學習「精神健康急救 (關懷長者版) 課程」，除咗提升自身嘅抗逆力外，仲可以幫到身邊人！甚至進一步受訓升呢成為「樂齡之友」，擔當社區精神健康嘅守護者！想報名嘅話，記得留意你嗰區嘅「賽馬會樂齡同行計劃 」合作機構「樂齡友里 」培訓課程開班時間，或密切留意「賽馬會樂齡同行計劃」Facebook專頁嘅公佈啦!
抗逆四式
喺屋企對住電腦work from home、無乜聚會、假期就留喺屋企hea住過，相信係好多人喺疫情期間都經歷過嘅「新常態」，不過長期喺屋企對住四面牆，想搵個人傾偈都無，好可能係一啲獨居或雙老家庭長者嘅日常！就算有啲長者平時會出去飲個茶、做下運動或者去社區中心活動，喺疫情高峰期間呢啲活動都少咗好多，難免令佢哋感到孤獨。其實面對疫情或逆境，無論咩年紀嘅人，喺體力同心態上都要有所調節，今日就等老夫子教大家「 #抗逆四式」嚟保持體魄同心靈強健啦！
第一式：郁郁貢 – 揀有興趣同啱自己嘅運動。Keep住活動筋骨，唔單止可以減慢機能衰退，更可以令心情愉悅！
跟住影片做伸展運動：https://www.youtube.com/watch?v=cUe7BvYMGcI&t=12s
更多有關賽馬會樂齡同行計劃影片：https://jcjoyage.hk/media/#section8_1
第二式：他他調 – 喺餘暇重拾或培養新興趣，例如學下種花或者煮幾味。即使唔係園藝或烹飪高手，亦可以從過程中發掘新事物，甚至「技能解鎖」！ 寫寫字、畫吓畫都得！
賽馬會樂齡同行計劃活動 – 造字遊樂園EP1：
https://www.youtube.com/watch?v=v7Z9nh3XNJE&list=PL85X35rQU1weBJnKJSzYk3Aj3Az7PKUsf
第三式：吹吹水 – 珍惜同親朋相聚嘅時光。如果無辦法見面，亦可以盡量利用電話用科技同親友保持聯繫、傾吓計。
參加「樂齡友里」義工培訓都係一個同人保持聯繫嘅方法，可以睇吓你所屬區域嘅計劃合作機構幾時開班，又或者留意本頁嘅公布。
第四式：淡淡定 – 避免過度關注可能令自己焦慮嘅事。偶爾嘗試從現實生活中抽離一吓，熄電視，熄電話，又或者打打坐、深呼吸、靜觀冥想！
賽馬會樂齡同行計劃活動 – 靜觀練習系列 之 靜觀呼吸：
https://www.youtube.com/watch?v=Nx9cwuQqG9Y
靜觀練習系列 之 身體掃描：https://www.youtube.com/watch?v=Pj150BjgH4g
如果大家留意到身邊嘅長者可能受到抑鬱困擾，亦請盡早聯絡「賽馬會樂齡同行計劃 」嘅合作機構尋求協助。
老夫子的生活練習
大家未必估到原來香港有超過130萬名登記義工！除咗提供前線服務同後勤支援，仲有一種專門為情緒受困人士提供精神健康同心理支援嘅義工，「賽馬會樂齡同行計劃」嘅「樂齡友里」義工就係其中之一。受過訓練嘅佢哋主要喺社區負責推廣長者心理健康，支援其他患有抑鬱症嘅長者；部分義工仲會獲邀修讀進階課程，以「樂齡之友」身分同社工共同協作，探訪同慰問社區內受抑鬱困擾嘅長者。佢哋會透過分享個人經歷、復元故事、生活知識同技能等，激勵長者建立復元目標，同長者喺心理健康嘅旅程上並肩同行！
不過，雖然「施比受更有福」，但義工同所有人一樣，都要面對生活中嘅順逆同情緒起伏，因此，喺無償為他人奉獻嘅時候，義工朋友都唔好忘記好好關顧自己嘅身心健康呀！
如果你係50歲或以上，有志喺社區中為支援受抑鬱困擾嘅長者出一分力嘅話，記得留意你嗰區嘅「賽馬會樂齡同行計劃 」合作機構「樂齡友里 」培訓課程開班時間，或密切留意「賽馬會樂齡同行計劃」Facebook專頁嘅公佈啦!
誰明大叔心
「可以笑的話，不會哭」往往係傳統男性嘅「強者表現」。你或你身邊嘅男士，喺情緒受困、甚至壓力爆煲嘅時候，係咪往往寧願獨自「置身寂寞路途」，都未必會主動搵人傾訴，甚至搵人幫手? 其實無論咩性別、身分、個性幾硬淨嘅人都有機會面對情緒問題，「男兒有淚不輕彈」、乜都收埋喺心容易久鬱成病，引致抑鬱或更嚴重嘅情緒問題。平時試下多加關心身邊嘅男士，如果察覺佢哋可能有情緒困擾，又唔知點幫佢哋走出情緒困局，可以嘗試尋求專業嘅心理支援，又或者鼓勵佢哋先做個簡單嘅情緒健康評估。
「賽馬會樂齡同行計劃」自2016年起一直為60歲或以上受抑鬱困擾嘅長者提供情緒支援，今年服務更正式推展至全港18區，合作機構接近50個。過往數據顯示，計劃嘅女性參加者較多，可能同男士傾向隱藏情緒、唔易主動求助有關。其實，計劃嘅合作機構會因應服務對象嘅興趣同需要而提供適切嘅介入服務，例如開設男士小組活動。如果有興趣了解計劃詳情，歡迎瀏覽「賽馬會樂齡同行計劃」網頁。
